कार्यक्रममा इप्पानका अध्यक्ष गणेश कार्कीले कार्यसमितिको तीनवर्षीय अवधिमा संस्थाले ऊर्जा क्षेत्रको विकास, नीतिगत सुधार तथा निजी क्षेत्रका ऊर्जा उत्पादकहरूको हकहित संरक्षणका लागि गरेका गतिविधिबारे जानकारी गराएका थिए। उनले आगामी दिनमा ऊर्जा क्षेत्रलाई थप प्रतिस्पर्धी, लगानीमैत्री र निर्यातमुखी बनाउन सरकार तथा निजी क्षेत्रबीच सहकार्य आवश्यक रहेको बताए।

वरिष्ठ उपाध्यक्ष मोहनकुमार डाँगी, उपाध्यक्ष आनन्द चौधरी तथा महासचिव बलराम खतिवडाले पनि बजेटका सकारात्मक पक्ष, ऊर्जा क्षेत्रमा देखिएका चुनौती तथा सुधार गर्नुपर्ने नीतिगत विषयहरूबारे धारणा राखेका थिए।

त्यसैगरी, कार्यक्रमका वक्ता तथा पूर्वअध्यक्ष एवं भूराजनीतिक विश्लेषक अरुणकुमार सुवेदीले ऊर्जा सुरक्षासँगै क्षेत्रीय ऊर्जा व्यापार, भूराजनीतिक परिवेश र नेपालको जलविद्युत् विकासका सम्भावनाबारे आफ्नो धारणा व्यक्त गरेका थिए।

कार्यक्रममा इप्पानका पूर्वअध्यक्षहरू, निवर्तमान अध्यक्ष, कार्यसमितिका सम्पूर्ण पदाधिकारी, सल्लाहकार, ऊर्जा उत्पादक तथा सरोकारवालासहित करिब ३०० जनाको सहभागिता रहेको थियो।

इप्पानले आयोजना गरेको उक्त कार्यक्रमले बजेट कार्यान्वयन, ऊर्जा क्षेत्रका अवसर तथा चुनौतीबारे साझा धारणा निर्माण गर्न सहयोग पुगेको सहभागीहरूले बताएका छन्।