महासंघले जारी गरेको प्रेस विज्ञप्तिअनुसार नेपालमा जलविद्युत उत्पादन, विद्युत पहुँच विस्तार, औद्योगिक विकास तथा डिजिटल प्रविधिको प्रयोग तीव्र रूपमा बढ्दै गएको सन्दर्भमा सुरक्षित, गुणस्तरीय तथा आधुनिक विद्युतीय सामग्रीको प्रयोगलाई प्रोत्साहन गर्ने उद्देश्यले प्रदर्शनी आयोजना गर्न लागिएको हो ।

प्रदर्शनीमार्फत उपभोक्ता, व्यवसायी तथा प्राविधिक क्षेत्रलाई नवीनतम प्रविधि, अन्तर्राष्ट्रिय मापदण्ड, सुरक्षा प्रणाली तथा ऊर्जा दक्ष समाधानबारे जानकारी गराइने महासंघले जनाएको छ । साथै यस कार्यक्रमले स्वदेशी विद्युतीय उद्योगको प्रवर्द्धन, विदेशी प्रविधि तथा लगानी आकर्षण, व्यवसायिक नेटवर्क विस्तार तथा अन्तर्राष्ट्रिय व्यापार सहकार्यलाई थप मजबुत बनाउने अपेक्षा गरिएको छ ।

चार दिनसम्म सञ्चालन हुने प्रदर्शनीमा नेपालसहित विभिन्न देशका प्रतिष्ठित कम्पनी, उत्पादक, आयातकर्ता, वितरक तथा प्रविधि प्रदायक संस्थाहरूको सहभागिता रहनेछ । प्रदर्शनीमा ट्रान्समिसन तथा डिष्ट्रिब्युसन सामग्री, स्मार्ट ऊर्जा समाधान, औद्योगिक तथा घरेलु विद्युतीय उपकरण, वायर तथा केबुल, एलईडी लाइटिङ, स्मार्ट स्विच, सुरक्षा प्रणाली, सौर्य ऊर्जा, अटोमेसन प्रणाली, सूचना प्रविधि तथा अत्याधुनिक इलेक्ट्रोनिक्स सामग्रीहरू प्रदर्शन गरिने जनाइएको छ ।

प्रदर्शनी अवलोकनकर्ताले एउटै स्थलमा विभिन्न राष्ट्रिय तथा अन्तर्राष्ट्रिय ब्राण्डका उत्पादन तुलना गर्न, प्राविधिक जानकारी लिन तथा नयाँ प्रविधिको प्रत्यक्ष अनुभव गर्न सक्ने व्यवस्था गरिएको आयोजकले जनाएको छ । यसले सुरक्षित विद्युतीय सामग्रीको प्रयोगबारे आम उपभोक्तामा सचेतना अभिवृद्धि गर्न सहयोग पुग्ने विश्वास गरिएको छ ।

त्यसैगरी प्रदर्शक कम्पनीहरूका लागि ‘फिन इलेक्ट्रो–टेक २०२६’ ब्राण्ड प्रवर्द्धन, नयाँ उत्पादन सार्वजनिक, व्यवसायिक नेटवर्क विस्तार तथा सम्भावित ग्राहक र वितरकसँग प्रत्यक्ष सम्पर्क स्थापना गर्ने प्रभावकारी प्लेटफर्म बन्ने अपेक्षा गरिएको छ । आयोजकका अनुसार प्रदर्शनीका सबै स्टल बुकिङ भइसकेका छन् ।

प्रदर्शनीको टाइटल स्पोन्सर ट्रान्सवेल्ड ट्रान्सर्फमर (ट्रान्सवेल्ड नेपाल प्रालि) रहेको छ भने पावर बाईमा ह्याभेल्स इन्डिया लिमिटेड रहेको छ । प्लेटिनम स्पोन्सरमा जनता केबल इन्डस्ट्रिज प्रालिको जनता केईआई, डायमण्ड स्पोन्सरमा लेजर इन्डिया प्राइभेट लिमिटेड र ग्रेटहाइट ग्लोबल प्रालि रहेका छन् ।

यस्तै, गोल्ड स्पोन्सरमा एसएमसी ग्लोबल प्रालिको ब्रिलेन्ट एलईडी रहेको छ । अफिसियल बैंकमा नविल बैंक लिमिटेड, अफिसियल इन्स्योरेन्समा सिद्धार्थ प्रिमियर इन्स्योरेन्स लिमिटेड तथा अफिसियल क्यारियरमा एसकेबी ग्रुप रहेका छन् । टेक्नोलोजी पार्टनरमा जुलाई टेक ल्याब्स, इन्टरनेट पार्टनरमा सजिलो नेट तथा प्रदर्शनी व्यवस्थापन मिडिया स्पेसले गरिरहेको जनाएको छ ।

नेपाल उद्योग वाणिज्य महासंघ, नेपाल उद्योग परिसंघ, नेपाल चेम्बर अफ कमर्शलगायत विभिन्न संस्थाको सहयोग तथा सहभागिता रहने प्रदर्शनीमा उद्योगी, व्यवसायी, प्राविधिक, इन्जिनियर, आर्किटेक्ट, विद्यार्थी, सञ्चारकर्मी तथा सर्वसाधारण गरी हजारौं आगन्तुक सहभागी हुने अपेक्षा गरिएको छ ।