हराएका सामग्री सजिलै फेला पार्ने ‘साओमी ट्याग’

साओमी ट्याग केवल १० ग्राम तौलको ट्र्याकिङ उपकरण हो, जसलाई चाबी, पर्स, झोला तथा सुटकेसजस्ता व्यक्तिगत सामग्रीमा प्रयोग गर्न सकिन्छ । विशेष ट्र्याकिङ एपमार्फत यसलाई विभिन्न उपकरणसँग जोड्न सकिने व्यवस्था गरिएको कम्पनीले जनाएको छ ।

कम्पनीका अनुसार प्रयोगकर्ताले सामग्री हराएमा ‘लस्ट मोड’ सक्रिय गरेर त्यसलाई हराएको सामग्रीका रूपमा चिन्हित गर्न सक्नेछन् । त्यसपछि उक्त सामग्री कसैले फेला पारेमा मालिकको सम्पर्क विवरण देखिने भएकाले सामग्री फिर्ता पाउन सहज हुने बताइएको छ ।

यसमा अनधिकृत ट्र्याकिङसम्बन्धी चेतावनी प्रणाली, सुरक्षित ट्र्याकिङ सुविधा तथा एक वर्षसम्म टिक्ने ब्याट्री जडान गरिएको छ । साथै आईपी ६७ स्तरको धुलो तथा पानी प्रतिरोधी क्षमताका कारण यसले सामान्य झट्का तथा दैनिक प्रयोग सहज रूपमा सहन सक्ने कम्पनीको दाबी छ ।

‘रेड्मी हेडफोन नियो’मा एआई–आधारित न्वाइज क्यान्सिलेसन

Redmi को नयाँ ‘रेड्मी हेडफोन नियो’मा ४२ डेसिबलसम्मको सक्रिय न्वाइज क्यान्सिलेसन सुविधा दिइएको छ । यसले बाहिरी अनावश्यक आवाजलाई कम गरी स्पष्ट र गुणस्तरीय श्रव्य अनुभव प्रदान गर्ने कम्पनीले जनाएको छ ।

हेडफोनमा ४० मिलिमिटरको डायनामिक ड्राइभर जडान गरिएको छ, जसले गहिरो बास र शक्तिशाली ध्वनि अनुभव दिने बताइएको छ । पूर्ण चार्जमा ७२ घण्टासम्म ब्याट्री टिक्ने कम्पनीको दाबी छ ।

यसमा एआईमा आधारित ध्वनि शुद्धीकरण प्रणालीसहित तीनवटा माइक्रोफोन जडान गरिएका छन्, जसले फोन कललाई अझ स्पष्ट र भरपर्दो बनाउने कम्पनीले उल्लेख गरेको छ ।

मूल्य र उपलब्धता

रेड्मी हेडफोन नियो कालो र हल्का सेतो (स्यान्ड ह्वाइट) रंगमा उपलब्ध हुनेछ । यसको मूल्य १२ हजार ९९९ रुपैयाँ तोकिएको छ ।

त्यसैगरी साओमी ट्यागको मूल्य २ हजार ९९९ रुपैयाँ निर्धारण गरिएको कम्पनीले जनाएको छ ।