संघका अनुसार प्रतियोगितामा सेन्ट्रल एसियाका आठ राष्ट्रको सहभागिता रहनेछ । सहभागी राष्ट्रहरूमा नेपाल, इरान, किर्गिस्तान, भारत, श्रीलंका, बंगलादेश, मालदिभ्स र कजाकिस्तान रहेका छन् ।

नेपालको राष्ट्रिय खेलका रूपमा रहेको भलिबलको विकास र विस्तारका लागि संघले विगत लामो समयदेखि राष्ट्रिय तथा अन्तर्राष्ट्रिय स्तरका प्रतियोगिता आयोजना गर्दै आएको जनाएको छ । विभिन्न प्रतियोगितामार्फत नेपालले स्वर्ण, रजत तथा कास्य पदक हासिल गर्दै अन्तर्राष्ट्रिय स्तरमा समेत उपस्थिति बलियो बनाएको संघको भनाइ छ ।

संघका अनुसार यो प्रतियोगिता एफआइभीबी वर्ल्ड र्‍याङ्किङसँग समेत सम्बन्धित भएकाले नेपाली महिला राष्ट्रिय टोलीले उत्कृष्ट प्रदर्शन गर्न सकेमा नेपालको विश्व वरीयतामा उल्लेख्य सुधार आउने अपेक्षा गरिएको छ ।

प्रतियोगिताको प्रत्यक्ष प्रसारण हिमालय स्पोर्ट्स ले गर्नेछ । संघले प्रतियोगिताको अधिकांश तयारी पूरा भइसकेको र बाँकी कार्यहरू निर्धारित समयभित्र सम्पन्न गरिने जनाएको छ ।

प्रतियोगिता आयोजना गर्न करिब २ करोड ५० लाख रुपैयाँ खर्च हुने अनुमान गरिएको छ । प्रतियोगिताका लागि नेपाल सरकार ले १ करोड रुपैयाँ तथा काठमाडौं महानगरपालिका ले २० लाख रुपैयाँ बजेट सहयोग गरेको संघले जनाएको छ ।