भेटमा नेपालको शिक्षा, विज्ञान तथा प्रविधि र खेलकुद क्षेत्रका विषयमा नर्वे सरकारको सहयोग र सहकार्यबारे छलफल भएको थियो। विशेषगरी, वर्तमान सरकारको प्राथमिकता, विद्यालय शिक्षामा नर्वेले गर्दै आएको सहयोगको निरन्तरता तथा आगामी साझेदारीका विषयमा केन्द्रित रहेर कुराकानी भएको मन्त्रालयले जनाएको छ।

भेटका क्रममा मन्त्री पोखरेलले नेपालको विद्यालय शिक्षा क्षेत्र—विशेष गरी समावेशिता, समता, ‘फन्डामेन्टल लर्निङ’ तथा ‘क्लाइमेट स्मार्ट एजुकेशन सिस्टम’—मा नर्वे सरकारबाट प्राप्त सहयोगप्रति आभार व्यक्त गर्नुभयो। उहाँले नर्वेको शिक्षा प्रणालीको उत्कृष्टताको प्रशंसा गर्दै नेपालले उक्त प्रणाली र प्रविधिबाट सिक्ने प्रशस्त अवसर रहेको उल्लेख गर्नुभयो। साथै, आवश्यक सहकार्यका लागि मन्त्रालय तयार रहेको उहाँको भनाइ थियो।

त्यसैगरी, राजदूत म्योसले नेपालको विद्यालय शिक्षामा नर्वेले पुर्‍याउँदै आएको सहयोगलाई निरन्तरता दिने प्रतिबद्धता व्यक्त गर्नुभयो। उहाँले नेपाल सरकारका प्राथमिकताहरूका बारेमा आफू जानकार रहेको उल्लेख गर्दै शिक्षा क्षेत्रमा थप सहकार्य गर्न नर्वे सरकार उत्सुक रहेको धारणा राख्नुभयो।