अन्तरक्रियामा सहभागी उद्योगी व्यवसायीहरुले राष्ट्रिय आर्थिक गणना २०८२ सफल बनाउन सरकारी निकाय र निजी क्षेत्रबीच सहकार्य आवश्यक रहेकोमा जोड दिएका थिए । नेपालभर सञ्चालनमा रहेका आर्थिक क्रियाकलाप गर्ने प्रतिष्ठानहरूको आधारभूत विवरण सङ्कलन, प्रशोधन, विश्लेषण र प्रकाशन गर्ने उद्धेश्यले राष्ट्रिय तथ्याङ्क कार्यालयले राष्ट्रिय आर्थिक गणना २०८२ सञ्चालन गर्न लागेको हो ।

अन्तरक्रिया कार्यक्रम महासंघका उपाध्यक्ष हेमराज ढकालले राष्ट्रिय आर्थिक गणनाले देशको वास्तविक आर्थिक अवस्था, उद्योग–व्यवसायको अवस्था, लगानीको प्रवृत्ति तथा रोजगारीको यथार्थ तथ्याङ्क उपलब्ध गराउने बताउँदै नीति निर्माणमा यसले महत्वपूर्ण भूमिका खेल्ने उल्लेख गर्नुभयो । उहाँले निजी क्षेत्रको सक्रिय सहभागिता बिना गणना सफल हुन नसक्ने भन्दै सबै आवश्यक सहयोग र सहकार्यका लागि महासंघ तयार रहेको बताउनु भयो ।

त्यस्तै, तथ्याङ्क कार्यालयका सहसचिव ढुण्डिराज लामिछानेले राष्ट्रिय आर्थिक गणना २०८२ ले औद्योगिक, व्यापारिक तथा सेवा क्षेत्रको विस्तृत तथ्याङ्क संकलन गरी प्रमाणमा आधारित नीति निर्माणमा सहयोग पुग्ने बताउनुभयो । उहाँले तथ्याङ्कको गोपनीयता सुनिश्चित गरिने स्पष्ट पार्दै व्यवसायीहरूले ढुक्क भएर आवश्यक विवरण उपलब्ध गराउन आग्रह गर्नुभयो ।

नेपालमा वि.सं. २०७५ मा प्रथम पटक राष्ट्रिय तथ्याङ्क कार्यालयले अन्तर्राष्ट्रिय औद्योगिक वर्गीकरणमा उल्लेखित विभिन्न १८ वटा समूहका आर्थिक एकाईहरू एकै पटक समेटिनेगरि आर्थिक गणना सम्पन्न गरेको थियो । राष्ट्रिय तथ्याङ्क कार्यालयले दोस्रो आर्थिक गणना २०८३ वैशाख २ असार ७ गतेसम्म सञ्चालन गर्न लागेको हो ।

कार्यक्रममा तथ्याङ्क कार्यालयका निर्देशक डा. वेद प्रसाद ढकालले राष्ट्रिय आर्थिक गणना २०८२ को आवश्यकता, उद्देश्य र यसको महत्वबारे प्रस्तुतिकरण गर्नुभएको थियो ।

राष्ट्रिय आर्थिक गणनाबाट सरकारले तय गर्ने नीति निर्माण र योजना तर्जुमा गर्न तथा नीति मार्फत लिएका लक्ष्यहरूको मापनमा सहयोग गर्ने, कूल गार्हस्थ उत्पादन तथा राष्ट्रिय लेखाका अन्य अनुमानको सुदृढीकरणका लागि आधारभूत तथ्याङ्क उत्पादन गर्ने, राष्ट्रिय लेखाका आधार वर्ष परिवर्तन गर्न आवश्यक तथ्याङ्क उत्पादन गर्ने, आर्थिक तथ्याङ्ककालागि गरिने सबै प्रकारका सर्वेक्षणहरूमा आवश्यक पर्ने नमूना छनौट फ्रेम निर्माण गर्ने, तथ्याङ्कीय व्यवसायिक रजिष्टर निर्माणको लागि आधार निर्माण गर्ने, अनौपचारिक अर्थतन्त्रका सूचकहरू तयार गर्ने लक्ष्य लिएको सो अवसरमा जानकारी दिइयो ।

अन्तरक्रिया कार्यक्रम सहभागी सरोकारवालाहरूले राष्ट्रिय आर्थिक गणनाको प्रभावकारिता, निजी क्षेत्रको सहभागिता, गणना प्रक्रियामा देखिन सक्ने चुनौती तथा सुधारका उपायबारे आ–आफ्ना धारणा राखेका थिए ।