सामाजिकशास्त्र तथा शिक्षा, व्यवस्थापन तथा कानुन र विज्ञान, स्वास्थ्य तथा प्रविधि गरी तीनवटा संकायका विद्यार्थीहरू दीक्षित भएका हुन्। कार्यक्रममा उत्कृष्ट प्रदर्शन गर्ने विद्यार्थीहरूलाई चान्सलर मेडल (कुलपति पदक) समेत प्रदान गरिएको थियो।

२०७३ सालमा स्थापित यो खुला विश्वविद्यालयले २०७४ सालदेखि विभिन्न तहका कार्यक्रमहरू सञ्चालन गर्दै आएको छ। स्नातक, स्नातकोत्तर, पोस्टग्राजुएट डिप्लोमा, एमफिल तथा पीएचडीसम्मका अध्ययनहरू खुला तथा दूर सिकाइ प्रणालीमार्फत प्रदान गर्दै आएको छ। यो विश्वविद्यालयले नेपालभित्र मात्र नभई विदेशमा रहेका नेपाली तथा अन्य विद्यार्थीहरूलाई गुणस्तरीय उच्च शिक्षाको पहुँच पुर्‍याउने लक्ष्य राखेको छ।

समारोहका प्रमुख अतिथि त्रिभुवन विश्वविद्यालयका पूर्व उपकुलपति केदारभक्त माथेमा हुनुहुन्थ्यो। प्रधानमन्त्री कार्कीले आफ्नो मन्तव्यमा छोटो समयमै विश्वविद्यालयले प्राज्ञिक क्षेत्रमा छुट्टै पहिचान स्थापित गरेको बताउँदै आगामी दिनमा थप प्रतिस्पर्धी, रोजगारमूलक, उद्यमशीलता तथा अनुसन्धानमुखी जनशक्ति उत्पादनमा जोड दिनुपर्नेमा जोड दिनुभयो।

उहाँले भन्नुभयो, “भौतिक रूपमा कक्षामा उपस्थित हुन नसक्ने दूर-दराजका तथा काम-व्यवसायमा व्यस्त विद्यार्थीहरूलाई समयअनुकूल उच्च शिक्षा प्रदान गर्न विश्वविद्यालयले अझ सशक्त भूमिका खेल्नुपर्छ। युवाहरूको बदलिँदो अपेक्षालाई सम्बोधन गर्दै प्रतिभा पलायन रोक्ने र उनीहरूको ज्ञान-सीपलाई राष्ट्रनिर्माणमा प्रयोग गर्ने चुनौती हामीसामु छ।”

प्रधानमन्त्री कार्कीले दीक्षित विद्यार्थीहरूलाई बधाई दिँदै उनीहरूले आर्जित ज्ञान र सीपलाई व्यक्तिगत विकास तथा राष्ट्र निर्माणमा सदुपयोग गर्न आग्रह गर्नुभयो। उहाँले विशेष अनुरोध गर्दै भन्नुभयो:

यो देश हाम्रो हो, हामीले नै बनाउने हो।

हामीले नै यसलाई बस्नलायक बनाउने हो, कोही आएर बनाइदिने छैन।

बेथितिबाट भाग्ने होइन, डटेर सामना गर्नुपर्छ।

सकेसम्म नेपालमै अवसर खोज्नुहोस्, नभए नयाँ अवसर सिर्जना गर्नुहोस्।

जहाँ गए पनि नेपालले गर्व गर्न सक्ने नागरिक बन्नुहोस्।

नेपाल खुला विश्वविद्यालयले खुला तथा दूर शिक्षा प्रणालीमार्फत उच्च शिक्षालाई सर्वसुलभ बनाउने क्रममा महत्वपूर्ण योगदान दिइरहेको छ। यो पहिलो दीक्षान्तले विश्वविद्यालयको यात्रालाई थप उत्साहजनक बनाएको छ। दीक्षित सबै विद्यार्थीहरूलाई हार्दिक बधाई तथा उज्ज्वल भविष्यको शुभकामना!