कोशी प्रदेशको सुनसरी, मोरङ र झापा जिल्लामा महासंघका अध्यक्ष घिमिरेसहित केन्द्रीय प्रतिनिधिहरूले जिल्ला संघका पदाधिकारीहरूसँग भेटघाट गरी सबै घरजग्गा व्यवसायीहरूलाई संगठित गर्न निर्देशन दिनुभयो । इलाम, धनकुटा र पाँचथर जिल्लामा भने तदर्थ समिति गठन गरी संयोजक तोकिएको छ ।

यसै क्रममा मिति २०८२।०७।२९ गते शनिबार सुनसरी जिल्लामा सुनसरी जिल्लामा ऐतिहासिक पहिलो अधिवेशन सम्पन्न भयो । अधिवेशनले नेत्रप्रसाद चौलागाईंको अध्यक्षतामा २१ सदस्यीय नयाँ कार्यसमिति चयन गरेको छ । नवनिर्वाचित उपाध्यक्षमा कर्णबहादुर लिम्बू रहनुभएको छ । त्यस्तै उदयपुर जिल्लामा पनि छिट्टै अधिवेशन गरी जिल्ला संघलाई पूर्णता दिन व्यवसायीहरूलाई सुझाव दिइएको छ ।

मधेस प्रदेशको सप्तरी, सिरहा, धनुषा, महोत्तरी, सर्लाही र रौतहट जिल्लामा जिल्ला संघका संयोजक, उपसंयोजक तथा व्यवसायीहरूसँग व्यापक छलफल भयो । अध्यक्ष घिमिरेले हाल कित्ताकट खुलेको अवस्थालाई स्वागत गर्दै बाँकी नीतिगत अप्ठ्यारा पनि छिट्टै समाधान हुने विश्वास दिलाउनुभयो । दर्ता हुन बाँकी जिल्ला संघहरूलाई यथाशीघ्र दर्ता प्रक्रिया पूरा गर्न निर्देशन दिइएको छ ।

बागमती प्रदेशको सिन्धुली, मकवानपुर र चितवन जिल्लामा पनि जिल्ला संघका पदाधिकारी तथा संयोजकहरूसँग भेटघाट भयो । दर्ता हुन बाँकी जिल्लाहरूमा व्यवसायीहरूलाई एकजुट गरी छिटो जिल्ला संघ दर्ता गर्न तथा संगठनलाई थप क्रियाशील र मजबुत बनाउन विशेष जोड दिइयो ।

महासंघका अध्यक्ष विष्णुप्रसाद घिमिरेले अभियानको पहिलो चरण अत्यन्त उत्साहजनक रहेको बताउँदै बाँकी प्रदेशहरूमा पनि यो अभियानलाई निरन्तरता दिइने जानकारी दिनुभयो । “हाम्रो मुख्य उद्देश्य भनेको देशभरका घरजग्गा व्यवसायीहरूलाई एकीकृत प्लेटफर्ममा ल्याएर नीतिगत सुधार र व्यवसायिक हकहितको संरक्षण गर्नु हो,” अध्यक्ष घिमिरेले भन्नुभयो ।

महासंघले यो अभियानलाई निरन्तरता दिँदै दोस्रो चरण चाँडै सुरु गर्ने जनाएको छ । यसले नेपालको घरजग्गा क्षेत्रलाई थप व्यवस्थित र संगठित बनाउने अपेक्षा गरिएको छ ।