एक्सपोमा ३० भन्दा बढी आईटी सेवा, सफ्टवेयर प्रडक्ट र सेवाहरूको प्रदर्शनी रहनेछ। कृत्रिम बुद्धिमत्ता (एआई), डिजिटल रुपान्तरण जस्ता नवीनतम प्रविधिमा केन्द्रित यो कार्यक्रमले आईटी कम्पनीहरू, उद्यमी, लगानीकर्ता, नीति निर्माता तथा सरकारी तथा निजी क्षेत्रका उच्च अधिकारीहरूलाई एउटै प्लेटफर्ममा ल्याउने लक्ष्य राखेको छ। अवलोकन निःशुल्क हुने भएकाले सूचना प्रविधिमा रुचि राख्ने सबैलाई सहभागी हुन अपिल गरिएको छ।

नास आईटीका अध्यक्ष गौरव पाण्डेले आईतबार काठमाडौंमा आयोजित प्रेस मिटमा भने, "यो एक्सपोले नेपालको आईटी कम्पनी, नेतृत्व र लगानीकर्तालाई सहकार्यको अवसर प्रदान गर्दै नवीनतम प्रविधिका सम्भावनाहरूमा केन्द्रित हुन सहयोग गर्नेछ। हामीले स्थानीय प्रविधिलाई प्रवर्द्धन गर्न यो पहिलो प्रयास गर्दैछौं।" उनले एक्सपोलाई परम्परागत प्रदर्शनीभन्दा फरक गरी व्यवसायिक अवसर, सहकार्य र ब्रान्ड निर्माणको गतिशील मञ्च बनाइएको उल्लेख गरे।

उपाध्यक्ष दीपेन चापागाईंले आईटी तथा व्यवसायिक समुदायबाट प्राप्त सकारात्मक प्रतिक्रियाबाट उत्साहित भएको बताउँदै भने, "सहकार्य, नवप्रवर्तन र विश्वासको बलमा नेपालको डिजिटल भविष्य निर्माण गर्ने यो एक्सपो एक ऐतिहासिक माइलस्टोन बन्नेछ।" महासचिव एलिसा श्रेष्ठले एक्सपोलाई "नेपालका आईटी प्रतिभा र व्यवसायिक अवसरहरूको सेतु" को रूपमा वर्णन गर्दै, कम्पनीहरूले आफ्ना नवीनतम डिजिटल समाधानहरू सार्वजनिक गर्न र लाइभ पिच सेशनमार्फत सोच प्रस्तुत गर्न सक्ने अवसर रहेको जानकारी दिइन्।

एक्सपो अवलोकनकर्तालाई विशेष अफरहरूको व्यवस्था गरिएको छ भने कम्पनीहरूले आफ्ना उत्पादनहरू प्रदर्शन गर्न पाउनेछन्। शीर्ष प्रायोजकमा अकाउन्टिङ सफ्टवेयर टिग रहेको छ, जसअनुसार 'टिगद्वारा प्रस्तुत नास आईटी एक्सपो २०२५' नामबाट कार्यक्रम सञ्चालन हुनेछ। सिल्भर प्रायोजकहरूमा इसेवा, र्यापिड, रिडक्ट, एनसेल बिजनेस, भायानेट कम्युनिकेसन र डेटा वर्ल्ड छन् भने दिगो विकास साझेदारमा ग्लोबल आईएमई बैंक र अर्किङ कलेजको योगदान रहेको छ।

नास आईटीको परिचय

नेपाल एसोसिएसन फर सफ्टवेयर एण्ड आईटी सर्भिस कम्पनिज (नास आईटी) नेपालका आईटी कम्पनीहरूको प्रतिनिधित्व गर्ने गैर-नाफामुखी संस्था हो। यसले प्रविधि नवप्रवर्तनलाई प्रोत्साहन गर्दै बजार सम्पर्क सुदृढ पार्ने र नेपाललाई वैश्विक प्रविधि केन्द्रका रूपमा स्थापित गर्ने लक्ष्य राखेको छ।

यो एक्सपोले नेपालको डिजिटल अर्थतन्त्रलाई थप मजबुत बनाउने अपेक्षा गरिएको छ। थप जानकारीका लागि नास आईटीको आधिकारिक वेबसाइट वा सामाजिक सञ्जालहरूमा सम्पर्क गर्न सकिन्छ।