हालको मौसमस्थितिमा लुम्बिनी, कर्णाली र सुदूरपश्चिम प्रदेशका धेरैजसो स्थानहरूमा आंशिकदेखि सामान्य बदली रही बागमती, गण्डकी लगायतका पहाडी भू–भागमा हल्का वर्षा भइरहेको छ। राजधानी काठमाडौं उपत्यकामा बिहानैदेखि आंशिक बदली रहेको छ भने दिउँसोतिर वर्षाको सम्भावना रहेको छ।

देशभर आंशिकदेखि सामान्य बदली हुनेछ। गण्डकी, कर्णाली, बागमती र सुदूरपश्चिम प्रदेशका थोरै स्थानहरूमा मेघगर्जन र चट्याङसहित हल्का देखि मध्यम वर्षा हुने सम्भावना छ। कोशी, गण्डकी, लुम्बिनी र सुदूरपश्चिमका एक–दुई स्थानमा भारी वर्षाको सम्भावना पनि रहेको छ।

महाशाखाले बाढी, पहिरो, डुबान, गेग्रान बहावजस्ता प्राकृतिक जोखिमहरूलाई ध्यानमा राखी उच्च सतर्कता अपनाउन आग्रह गरेको छ। यात्रुहरूलाई आवश्यक सतर्कता र सुरक्षाका उपाय अपनाउन, नदी आसपासका क्षेत्रहरूमा बसोबास गर्नेलाई सजग रहन, तथा सडक तथा हवाई यातायातका प्रयोगकर्ताहरूलाई मौसम अनुरूप योजना बनाउन अनुरोध गरिएको छ।