‘पर्वतीय पर्यटन : हाम्रो शान, हाम्रो पहिचान’ शीर्षकमा आयोजित प्रदर्शनी अवलोकनपछि सीईओ जोशीले तस्बिरमार्फत नेपालको प्राकृतिक सौन्दर्य र सांस्कृतिक विविधता उजागर गर्न सकिने धारणा राखेका हुन्। उनका अनुसार यस्ता प्रदर्शनीहरूले केवल दृश्य सामग्री प्रस्तुत गरेर सीमित नहुने, बरु देशको पर्यटन सम्भावना झनै प्रस्ट्याउने काम गर्नेछन्।

“यी तस्बिरहरू अत्यन्त जानकारीमूलक र घुम्न प्रेरणा दिने खालका छन्। अझ धेरै मानिसहरुसम्म पुर्‍याउन बोर्ड सहकार्य गर्न तयार छ,” सीईओ जोशीले बताए। उनले पर्यटन क्षेत्रमा रोजगारी सिर्जना र आर्थिक वृद्धिका सम्भावनाहरूलाई पनि जोड दिएका थिए। “हामीसँग देखाउन सकिने धेरै कुराहरू छन्, यस्ता प्रदर्शनीले युवाहरूलाई देशमै अवसर खोज्न पनि प्रेरित गर्छ,” उनले थपे।

कार्यक्रममा राससका कार्यकारी अध्यक्ष धर्मेन्द्र झाले प्रदर्शनी नेपालका हिमाल, हिमाली जीवनशैली र प्रमुख पर्यटकीय गन्तव्यहरूलाई उजागर गर्न सफल भएको बताए। उनले नेपालका हिमशृङ्खलाहरू, हिमाली जनजीवन, र पूर्वदेखि पश्चिमसम्मका ९६ वटा तस्बिरहरूको समावेशले मुलुकको पर्यटन विविधता सम्पूर्ण रूपमा प्रस्तुत गरेको उल्लेख गरे।

सीईओ जोशीले प्रदर्शनीलाई पुस्तकको रूपमा प्रकाशन गरी अन्तर्राष्ट्रिय फोरमहरूमा प्रस्तुत गर्न सके नेपालको पर्वतीय पर्यटन अझ प्रख्यात हुने विश्वास व्यक्त गरे। राससले आयोजना गरेको यो प्रदर्शनी जेठ ११ गतेदेखि सुरु भएको हो।

आयोजक संस्थाहरूले यस्ता कार्यक्रमले नेपाल–विश्व पर्यटन नक्शामा अझ मजबुत रूपमा स्थापित हुने विश्वास व्यक्त गरेका छन्।