कार्यक्रममा कञ्चनजंघा आरोहण गरिसकेका अनुभवी पर्वतारोहीहरूका प्रेरणादायी अनुभव, संघर्ष र भावना सुनाइयो। विशेष गरी नेपालका प्रसिद्ध पर्वतारोही मिङ्मा डेभिड शेर्पाले आफ्नो साहसिक शिखर यात्रा बारे बोल्दा सभाहल तालीले गुञ्जायमान बनेको थियो। उनले हिमाली पारिस्थितिक प्रणालीप्रति सम्मान गर्न, जलवायु संकट न्यूनीकरण गर्न र दिगो भविष्यका लागि विश्व समुदाय एकजुट हुन आह्वान गरे।

कार्यक्रममा कञ्चनजंघा क्षेत्रका स्थानीय समुदायको योगदानलाई पनि विशेष रूपमा उजागर गरियो। पर्यटन प्रवर्द्धनमा उनीहरूको भूमिका, परम्परागत संस्कृति र दिगोपनप्रति समर्पणलाई सम्मान गरिएको थियो।

उक्त अवसरमा नेपाल पर्यटन बोर्डका प्रमुख कार्यकारी अधिकृत (CEO) दीपक राज जोशीले कञ्चनजंघालाई "हिमाल मात्र नभई जीवित सम्पदा" को रूपमा व्याख्या गर्दै भने, "यसले समुदायलाई जोड्छ, साहसिक पर्यटकलाई प्रेरणा दिन्छ, र हामी सबैलाई प्रकृति संरक्षणप्रति उत्तरदायी बनाउँछ।" उनले नेपाल–बेलायत मित्रता यस्ता कार्यक्रममार्फत अझ बलियो हुने विश्वास व्यक्त गरे।

कार्यक्रममा बेलायतका एडिनबरा ड्युक, राजकुमार एडवर्डको समेत उपस्थिति रहेको थियो, जसले नेपाल–बेलायत सम्बन्धलाई अझै जनस्तरसम्म फैलिएको मित्रताको प्रतिकका रूपमा चित्रित गर्यो।

नेपाल पर्यटन बोर्डका प्रतिनिधि, बेलायतस्थित नेपाली राजदूतावासका पदाधिकारी, नेपाली समुदायका सदस्य तथा पर्वतारोहणप्रेमीहरूको उल्लेखनीय उपस्थिति रहेको उक्त कार्यक्रमले दिगो, उत्तरदायी र समावेशी हिमाली पर्यटनप्रति सबैको साझा प्रतिबद्धता दर्शाएको आयोजकले जनाएका छन्।