बैंकले जारी गरेको आधिकारिक विज्ञप्तिमा भनिएको छ, नबिल बैंक परिवारको तर्फबाट श्री मनोज कुमार ज्ञवालीज्यूलाई प्रमुख कार्यकारी अधिकृतमा नियुक्त भएकोमा हार्दिक बधाई तथा सफल कार्यकालको शुभकामना व्यक्त गर्दछौं।

भारतको प्रतिष्ठित The Institute of Chartered Accountants of India बाट चार्टर्ड एकाउन्टेन्टको उपाधि प्राप्त गरेका ज्ञवालीसँग बैंकिङ तथा पुँजी बजारमा २६ वर्षभन्दा बढीको अनुभव छ। नेपाल राष्ट्र बैंक, ग्लोबल आइएमई बैंक, ग्लोबल आइएमई क्यापिटल, र ज्योति विकास बैंक लगायतका संस्थाहरूमा उनले उच्च पदमा रहेर कार्य गरिसकेका छन्।

बैंकका अनुसार, उहाँको रणनीतिक दृष्टिकोण, स्पष्ट विचारधारा, र दिगो वित्तीय विकासमा योगदान पुर्‍याउने क्षमता नबिल बैंकको भावी यात्रामा मार्गनिर्देशक हुने विश्वास लिइएको छ। विज्ञप्तिमा उल्लेख गरिएअनुसार, ग्राहक सेवा, नवप्रवर्तन र स्थायित्वमा अझ सुदृढ प्रगति गर्ने अपेक्षाका साथ नबिल बैंक उहाँको नेतृत्वमा अगाडि बढ्नेछ।

नबिल बैंक हाल देशभर २८० भन्दा बढी शाखा र सेवा केन्द्रमार्फत आफ्ना ग्राहकहरूलाई बैंकिङ सेवा दिइरहेको छ। नयाँ नेतृत्वसँगै बैंकले सस्टेनेबल फाइनान्स, डिजिटल बैंकिङ, र ग्राहक–केन्द्रित सेवा सुधारमा थप ध्यान दिने संकेत दिएको छ।

ज्ञवालीको नियुक्तिसँगै बैंकिङ क्षेत्रका विश्लेषकहरूले नबिल बैंकको रणनीतिक उचाइ अझ मजबुत हुने अपेक्षा गरेका छन्।