मन्त्री पाण्डेले सगरमाथा केवल एक हिमाल नभई नेपालको सांस्कृतिक र प्राकृतिक पहिचानको प्रतीक भएको उल्लेख गर्नुभयो। “हामी यहाँ सगरमाथा आरोहीहरूको साहस र समर्पणको कदर गर्न मात्र होइन, उनीहरूको योगदानबाट प्रेरणा लिन पनि उपस्थित छौं,” उहाँले भन्नुभयो। उहाँले शेर्पा समुदाय, पथप्रदर्शक, उद्धारकर्मी, र हिमाली क्षेत्रमा खटिने सबैलाई विशेष धन्यवाद दिनुभयो।

नेपाल सरकारले पर्वतारोहणलाई सुरक्षित र दिगो बनाउन पूर्वाधार विकास, तालिम, र वातावरण संरक्षणमा जोड दिएको मन्त्री पाण्डेले बताउनुभयो। “हिमालहरू हाम्रो सभ्यता र सहअस्तित्वको सेतु हुन्। यिनको संरक्षण हाम्रो साझा जिम्मेवारी हो,” उहाँले जोड दिनुभयो। जलवायु परिवर्तन र विश्वव्यापी तापमान वृद्धिका कारण हिमालहरू खतरामा परेको उल्लेख गर्दै उहाँले संरक्षणमा सावधानी र जिम्मेवारीपूर्ण कदम चाल्नुपर्ने बताउनुभयो।

नेपाल पर्यटन बोर्डका प्रमुख कार्यकारी अधिकृत दीपकराज जोशीले सगरमाथासहितका हिमालहरूले नेपाललाई साहसिक पर्यटनको विश्वव्यापी गन्तव्यका रूपमा स्थापित गरेको बताउनुभयो। सगरमाथा आरोही संघका अध्यक्ष डम्बर पराजुलीले यो समिटले विश्वभरका आरोहीहरूको सम्मान र प्रेरणा बढाउन महत्त्वपूर्ण भूमिका खेल्ने विश्वास व्यक्त गर्नुभयो।

एभरेस्ट एलायन्स नेपालद्वारा आयोजित यो पहिलो अन्तरराष्ट्रिय समिटमा २५ देशका ३०० भन्दा बढी पर्वतारोही सहभागी थिए। भारत, चीन, अमेरिका, बेलायत, इटाली, नर्वे, सिंगापुर, अस्ट्रेलिया, र अन्य देशका प्रतिनिधिहरूले समिटमा भाग लिए। आयोजकका अनुसार, समिटले दिगो पर्यटन, हिमाली वातावरण संरक्षण, र स्थानीय समुदायको उत्थानका लागि छलफलको मञ्च प्रदान गरेको छ।

कार्यक्रममा सन् १९५३ मा सर एडमन्ड हिलारीसँगै सगरमाथा आरोहण गर्ने कान्छा शेर्पालाई ‘लाइफटाइम एचिभमेन्ट अवार्ड’ प्रदान गरियो। साथै, कीर्तिमानी आरोही मिङ्मा शेर्पा र हरिबहादुर बुढालाई पनि सम्मानित गरिएको थियो।

‘सगरमाथा हाम्रो गौरव र जिम्मेवारी’ भन्ने नारासहित यो समिटले हिमालको पर्यावरणीय संकट, जिम्मेवार पर्वतारोहण, र अन्तरराष्ट्रिय सहकार्यको आवश्यकतामा ध्यान केन्द्रित गरेको छ। आयोजकले यो समिटले नेपाललाई दिगो र सुरक्षित पर्वतारोहण गन्तव्यका रूपमा स्थापित गर्न महत्त्वपूर्ण योगदान पुर्‍याउने विश्वास व्यक्त गरेका छन्।