अध्यक्ष विष्णुप्रसाद घिमिरेज्यूको प्रमुख आतिथ्यतामा सम्पन्न उक्त कार्यक्रममा प्रमुख अतिथि घिमिरेले तीन वर्षअघि महासंघको पहलमा तदर्थ समिति बनाई स्थापना गरिएको संघले पहिलो साधारण सभा सम्पन्न गरेकोमा गर्व लागेको प्रतिक्रिया दिनुभयो।

उहाँले ठूलो लगानी आवश्यक पर्ने रियलस्टेट क्षेत्रमा लगानी जुटाउने उद्देश्यले नेपाल अर्बान इन्भेस्टमेन्ट डेभलपमेन्ट कम्पनी स्थापना गरिएको जानकारी दिनुभयो। साथै, सम्पूर्ण रियलस्टेट व्यवसायीहरूलाई कम्पनीमा लगानी गर्न आह्वान गर्दै आयोजक संघलाई धन्यवाद र नवनिर्वाचित कार्यसमितिलाई बधाई तथा शुभकामना दिनुभयो।

कार्यक्रममा महासंघका उपाध्यक्ष दीपक कुँवरले रियलस्टेटलाई मुलुकको अर्थतन्त्रको मेरुदण्डको रूपमा परिभाषित गर्नुभयो। उहाँले समाजमा यसप्रति सकारात्मक दृष्टिकोण विकास गर्नुपर्ने आवश्यकता औँल्याउँदै, कृषियोग्य बाहेकका जग्गामा विकास कार्य गर्न हदबन्दी छुट दिनुपर्नेमा जोड दिनुभयो।

उहाँले “समृद्ध नेपाल, सुखी नेपाली” भन्ने नारालाई व्यवहारमा उतार्न जरुरी रहेको उल्लेख गर्दै, महासंघको सबल नेतृत्वमा तयार गरिएको अवधारणालाई कार्यान्वयन गर्न देशभर भ्रमण भइरहेको बताउनुभयो। काठमाडौँको नयाँ बसपार्कजस्तै पीपीपी मोडेलमा ठूला आयोजना निर्माण गर्न सकिने उदाहरण प्रस्तुत गर्दै, नेपाल अर्बान इन्फ्रास्ट्रक्चर डेभलपमेन्ट कम्पनीमार्फत देशभरका व्यवसायीलाई समेट्ने योजना रहेको बताउनुभयो।

साथै, लुम्बिनी प्रदेश र विशेषगरी दाङका व्यवसायीसँग सहकार्य गर्न तयार रहेको प्रतिबद्धता व्यक्त गर्दै, सातै प्रदेशमा अन्तरक्रिया कार्यक्रम सञ्चालन गरी लगानी आकर्षित गर्ने योजना रहेको जानकारी दिनुभयो।

साधारण सभाले रामप्रसाद पोखरेलको अध्यक्षतामा १७ सदस्यीय नयाँ कार्यसमिति निर्विरोध निर्वाचित गरेको छ।

नवगठित कार्यसमितिले दाङ जिल्लामा आवास तथा जग्गा विकासको पारदर्शी र व्यवस्थित अभ्यासलाई प्रवर्द्धन गर्ने, रियलस्टेट क्षेत्रलाई अझ व्यावसायिक बनाउने, तथा प्रदेशस्तरीय सहकार्य विस्तार गर्ने लक्ष्य लिएको जनाइएको छ।