गत बिहीबार सम्पन्न कार्यक्रमले नेपालको फिनटेक उद्योगलाई रणनीतिक संवाद, प्रविधि प्रदर्शनी र डिजिटल वित्तीय रूपान्तरणतर्फ उन्मुख गराउने उद्देश्य राखिएको थियो। कार्यक्रममा करिब ४ सय अन्तर्राष्ट्रिय तथा राष्ट्रिय वित्तीय संस्था, प्रविधि कम्पनी, नियामक निकाय तथा फिनटेक नेताहरुको सहभागिता रहेको थियो।

नेपाल फिनटेक फेस्टिवलको अवधारणा काठमाडौँ फिनटेकका संस्थापक संजिव सुव्बाले ल्याएका हुन्। कार्यक्रममा नेपाल राष्ट्र बैंकका निवर्तमान गभर्नर महाप्रसाद अधिकारीलाई डिजिटल भुक्तानी विकासमा योगदान पुर्याएको भन्दै सम्मान गरिएको थियो।

सिंगापुरस्थित डीबीएस बैंकका पूर्वचिफ इनोभेशन अफिसर नील क्रस, भारत स्थित सूर्योदय स्मल फाइनान्स बैंकका बोर्ड सदस्य दीपक शर्मासहित विभिन्न अन्तर्राष्ट्रिय फिनटेक नेतृत्वकर्ताहरुले फिनटेकमा नविनतम प्रविधि, साझेदारी रणनीति र एआईको भूमिकाबारे प्यानल छलफलमा सहभागिता जनाएका थिए।

युनियनपे साउथ एशिया ब्रान्चका प्रमुख बिङहान हूले नेपाल इन्भेस्टमेन्ट मेगा बैंकसँग कार्ड इशुएन्स सम्झौता गरेका थिए। साथै, एनएमबि बैंक, नबिल बैंक, मुक्तिनाथ विकास बैंक, ग्लोबल आइएमई बैंकका सीईओ र उपप्रमुखहरुले समेत कार्यक्रमलाई सम्बोधन गरेका थिए।

यस कार्यक्रमलाई नेपाल क्लियरिङ हाउसले प्रायोजन गरेको थियो भने, विभिन्न अन्तर्राष्ट्रिय फिनटेक संस्थाहरुको सहकार्यमा आयोजना गरिएको थियो। आयोजक संस्थाका अनुसार नेपाल फिनटेक फेस्टिवल २०२५ ले नेपाललाई दक्षिण एसियाली फिनटेक संवादको केन्द्र बनाउने दिशामा नयाँ ढोका खोलेको छ।